JDPU Musiqiy madaniyat fakulteti tashkil etgan teatrlashtirilgan tadbir ana shunday nomlandi. Bahorning ilk kunida taniqli jamoat arbobi, sadoqat va vafo kuychisi, O‘zbekiston xalq shoirasi Zulfiyaxonim tavallud sanasi keng nishonlanadi. Mazkur muborak sana munosabati bilan universitet Madaniyat saroyida bo’lib o’tgan tadbirni fakultet dekani X.Omonov ochib berdi.
Tadbirda fakultetning iste’dodli talabalari tomonidan sahna ko‘rinishlari, dilbar raqslar ijro etildi. Shoira qalamiga mansub she’rlar o‘qildi. E. Lutfullaev nomidagi talabalar maqom ansambli tomonidan maqomlar kuylandi.
Bahor va go‘zallik, nafosat va ulug‘vorlik, sadoqat tuyg‘ularini o‘z she’rlarida tarannum etgan Zulfiyaxonim ijodi bugun tom ma’noda o‘zbek adabiy muhitida benazir o‘rin tutadi. Bo‘lib o‘tgan tadbirda ham shoiraning boy adabiy merosi va unda aks etgan ezgu fikrlar xususida keng so‘z yuritildi.
