JDPUda “Atlas sayli” bo‘lib o‘tdi.
Bugungi kunda ko‘cha-ko‘yda atlas yo adrasdan tikilgan libosdagi qizu juvonlarni ko‘rganimizdada har birimizning ko‘zimiz yashnab ketadi, ko‘nglimiz g‘ururga to‘ladi. O‘zbek Xalqining mana shunday qimmatbaho merosi borligidan hayratimizga hayrat qo‘shiladi, faxrimizga faxr esh bo‘ladi. Bugungi kunda Atlas va adras matolari YuNESKOning jahon nomoddiy madaniy merosi ro‘yxatiga kiritilgan.
Jizzax davlat pedagogika niversiteti Maktabgacha ta’lim fakulteti tashabbusi bilan tashkillashtirilgan “Atlas sayli” talaba qizlarning milliy liboslar namoyishi bilan boshlandi. 10 dan ortiq nominatsiyalar tanlovida ishtirok etgan ishtirokchilar o‘zlarining liboslarini ta’riflash bilan bir qatorda uning talaba qizlar uchun qulay tomonlarini ham so‘zlab berishdi. “Atlas sayli”da hakamlar hay’ati tomonidan eng munosiblar g‘olib deb topildi.
– Bilasizmi, mening hali ham atlas va adras ko‘ylaklarga mehrim bo‘lakcha. Mavridi topildi deguncha do‘kon va bozorlarga aylanib, ana shu matolarni izlayman. Uni zamonaviy rusumda tiktirib kiyaman. Egnimda atlas bo‘lsa, qalbim milliy g‘ururga to‘lib, o‘zimni baxtiyor sezaman. Axir u ming asrlik tarixga ega, millatimizning iftixori, u bizga momolarimizdan yetib kelgan bitmas-tuganmas boyligimizdir. Yodingizda bo‘lsa, ilgarilar onalarimiz qizlariga beshik berganida, sunnat to‘ylar qilganida nabiralariga sarpolar qilsa, albatta, jajji qiz nevaralariga atlas ko‘ylak, o‘g‘il bolalarga zar chopon, do‘ppi tikib kiydirardilar. Menimcha, bunda ham ajoyib hikmat bor. Maktabgacha ta’lim fakulteti tomonidan tashkil etilgan “Atlas sayli” ana shu qadriyatlarimizni o‘sha jozibadorligi bilan qaytarishga xizmat qilsa ne ajab,-deydi universitet xotin qizlar qo‘mitasi raisi Ziyoda Abduvalieva
Kiyim barcha millat va elat vakillarida o‘ziga xos ahamiyat kasb etadi. Ularning o‘ziga xos va munosib kiyimlari borki, ular milliy liboslarga aylanib ulgurgan. O‘zbek xalqining o‘ziga xos va betakror milliy kiyimlariga xususan adras va atlasga butun dunyo havas qiladi. Jizzax davlat pedagogika universiteti hovlisida o‘tkazilgan “Atlas sayli” o‘ziga xos milliyligimizni yana bir namoyish etgan bayramlardan biri bo‘ldi desak xato qilmagan bo‘lamiz.
Zotan milliy liboslar – g‘ururimiz, faxrimiz, ma’naviy boyligimiz, ularni e’zozlab, egnimizga kiyar ekanmiz, qalbimizni quvonch, baxt, shodlik tuyg‘ulari chulg‘ab olaveradi.
