JDPU Xorijiy tillar fakulteti Ingliz tili amaliy kursi kafedrasi o‘qituvchilari tashabbusi bilan O‘zbekiston Erasmus+ Milliy ofisi vakillari ishtirokida «Qanday qilib yaxshi loyiha taklifini ishlab chiqish kerak?» (“How to develop a good project proposal?”) mavzusida ilmiy-amaliy seminar tashkil etildi.
Seminarni ilmiy ishlar va innovatsiyalar bo‘yicha prorektor G‘ayrat Qodirov ochib berdi. O‘zbekiston Erasmus+ Milliy ofisi loyiha menejerlari tadbir davomida Erasmus dasturining maqsad va vazifalariga batafsil to‘xtalib o‘tdi. Seminarning asosiy maqsadi Erasmus loyihasi borasidagi xabardorlikni oshirish va 2024 yil uchun davom etayotgan Erasmus+ takliflarini ilgari surishdir.
Tadbirda Samarqand davlat universiteti, O‘zbekiston-Finlandiya instituti, Sambraham universiteti, Jizzax politexnika instituti o‘qituvchilari ham ishtirok etishdi. Tadbir davomida Erasmus+ Milliy ofisi vakillari dastur imkoniyatlari va tegishli yo‘nalishlar haqida; potensial talabnoma beruvchilar «Qanday qilib yaxshi loyiha taklifini ishlab chiqish kerak?» mavzusida ma’lumot almashdilar.
Shuningdek, oliy ta’limda salohiyatni oshirish (CBHE) dasturi borasidagi arizalar qay tariqa taqdim etilishi va bu boradagi hamkorlarni topish bo‘yicha maslahatlar berildi. Seminar yakunida ishtirokchilar Erasmus dasturi va unga qay tarzda ishtirok etish bo‘yicha bilimga ega bo‘ldi.
